Associação dos Médicos de Timor-Leste (AMTL) realiza Treinamentu kona ba Primary Trauma Care/PTC (Kuidadu Primariu ba Trauma) iha Edifisiu AMTL 11-12 Setembru 2026.
AMTL ho apoiu husi Gabinete Apoiu Sociedade Civil realiza Treinamentu Kona ba PTC ba membru AMTL nain 15 ne’ebé servisu iha Municipio 9 : Covalima, Ainaro, Manufahi, Aileu, Ermera,
Bobonaro, Liquiça, Dili no RAEOA.
Treinamentu ne’e loke oficialmente husi Presidente Associação dos Médicos Timor-Leste dr. Herculano Seixas dos Santos,Esp.Cardiología no Diretora Nacional de Programação GASC Sra. Suzety H. P. M. Soares.
Instrutor ba Programa Treinamentu ne’e mak peritu sira husi AMTL kompostu husi Medico Especialista iha area Sirujia, Ortopedista, Anestesia no Mediku Jeral postgraduasaun iha area Sirujia no Anestesia ne’ebé lidera husi dr João Pedro,MMed (surgeon) no dr.Mingota Herculano, MMed (Anestesia).
Treinamentu ne’e sei kobre topiku oi-oin kona ba kuidadu trauma primariu nian (Primary Trauma Care), hahu kedas husi Kontextu lokal,identifikasaun ba trauma, triagem, trauma ba inan isin rua no labarik, queimadura no manajementu ba dezastre (Disaster management), suporta vital baziku, kuidadu pre hospitalar no referal. Iha formasaun ne’e realiza mos simulasaun ba kazu, pre test no post test no distribuisaun sertifikadu ba formando sira hafoin konklui treinamentu iha loron daruak.
Alvu ba treinamentu ida ne’e mak membru AMTL sira hotu, Sei hahu uluk ho Mediku Jeral sira ne’ebé servisu iha Sentru Saúde no halo rotasaun iha unidade emerjensia no gradualmente sei expande ba membru AMTL sira hotu husi 13 municipios.
Objetivu husi treinamentu ne’e mak atu hasa’e kapasidade teknika no sientifika membru AMTL nian kona ba abordajem integradu no sistematiku ba kuidadu trauma no hadiak prestasaun servisu iha area kuidadu ba trauma.
AMTL Agradece ba GASC, instrutor sira, Komisaun Organizadora no Media (RTTL,GMN,Tatoli no Timor-Post ba apoiu inkondisional, kolaborasaun no partisipasaun ativa hodi fo susesu ba atividade ne’e.
Sede AMTL,11/09/2026. (red.)